کابل کې د اتو لوبډلو ترمنځ د ويلچر بسکټبال ټاکنيزې سيالۍ پای ته ورسېدې
د پارا المپيک ملي فدراسيون په همکارۍ د سور صليب په ورزشي جمنازيوم کې د اتو لوبډلو ( ۸۰ ) ورزشکارانو ترمنځ د ويلچر بسکټبال ټاکنيزې سيالۍ پای ته ورسېدې،چې درې ورځې يې دوام وکړ.
په دغو سياليو کې د هرات، فارياب، بلخ، بدخشان، ننګرهار، پروان، لغمان او کابل ولایتونو ورزشکارانو ګډون کړی وو، چې په پايله کې ۱۲ ورزشکاران د افغانستان ويلچر بسکټبال ملي لوبډلې ته وټاکل شول.
د دغو سياليو په پايلوبه کې بلخ لوبډلې خپلې سیالې ننګرهار لوبډلې ته د ۶۶/۴۰ امتيازونو په توپير ماتې ورکړه او اتلولي يې خپله کړه.
د يادو سياليو موخه د بسکټبال ملي لوبډلې ته د غوره ورزشکارانو ټاکل او ورزش ته د معلولينو هڅول و؛ د سياليو په پای کې غوره لوبډلو او لوبغاړو ته کپ، مډالونه او ورزشي توکي ورکړل شول.
د يادونې وړ ده، چې د دغو سياليو په پای مراسمو کې د المپیکي چارو رئیس داد محمد پاينده اختري، د ورزش ادارې فني او مسلکي رئيس محمد يوسف افتخار، د NOVE Caring Human موسیسې رئيس البرټ کایرو، د ورزش ادارې مسوولینو او ورزشکارانو ګډون کړی وو.
