کونړ؛ ناړۍ ولسوالۍ کې د ٢٣ لوبډلو ترمنځ د ټېپ بال کرېکټ سیالۍ پای ته ورسېدې
د کونړ ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د ياد ولايت په ناړۍ ولسوالۍ کې د ٢٣ لوبډلو ترمنځ د ټېپ بال کرېکټ سیالۍ د غازي آباد لوبډلې په اتلولي پای ته ورسېدې.
د یادو سیالیو پایلوبه د غازي آباد او ساوو لوبډلو ترمنځ ترسره شوه. غازي آباد لوبډلې د لوبې پچه وګټله او لومړی یې د توپ وهنې پرېکړه وکړه چې په ټاکلو لسو اورونو کې یې د خپلو شپږو لوبغاړو په له لاسه ورکولو سره خپلې سیالې لوبډلې ته د ١٢٢ منډو هدف وټاکه. ساوو لوبډلې د هدف په تعقیب کې د خپلو پنځو لوبغاړو په له لاسه ورکولو سره ١١١ منډې وکړې او لوبه یې د لسو منډو په توپیر وبایلله.
يادې سیالۍ د سیمې د ځوانانو ترمنځ د یووالي په موخه ترسره شوې چې یوه میاشت یې دوام وکړ او په پای کې اتلې لوبډلې او غوره لوبغاړو ته چمتو شوې ډالۍ ورکړل شوې.
