هلمند؛ مرکز لښکرګاه ښار کې د څلورو ولایتونو ترمنځ د سوېل لویدیځ زون فوټبال سیالۍ پای ته ورسېدې
د هلمند ولایت د بدني روزنې او ورزش امریت اړوند د فوټبال فدراسیون د استازولي له لوري او د اتصالات مخابراتي شرکت او پوپل او ورونو خدماتي شرکت په مالي ملاتړ د یاد ولایت مرکز لښکرګاه ښار کې د څلورو ولایتونو ترمنځ د فوټبال سیالۍ د هلمند هارون پوپل لوبډلې په اتلولي پای ته ورسېدې.
په دغو سیالیو کې هلمند، کندهار، ارزګان او غزني ولایتونو لوبډلو ګډون کړی و، چې په پایله کې یې د هلمند ولایت هارون پوپل لوبډلې د زیاتو نمرو په ترلاسه کولو سره لومړی او د کندهار الفت استقلال لوبډلې دویم مقام خپل کړ.
دا سیالۍ د افغانستان اتلانو لیګ ته د شپږو زونونو څخه د غوره لوبډلو د ټاکلو په موخه ترسره شوې، چې پنځه ورځې یې دوام وکړ او په پای کې شریف الله عزیزي د سیالیو د غوره لوبغاړي، میراجان نورزي د غوره ګول وهونکي او جاوېد احمد توفان د غوره ګول ساتونکي ډالۍ ترلاسه کړې.
