ننگرهار؛ بټي کوټ شاهين لوبډلې د مومندرې ولسوالۍ د ټېپ بال کرکټ سياليو اتلولي وگټله
د ننگرهار ولايت د بدني روزنې او سپورټ رياست په همکارۍ د مومندرې ولسوالۍ په چمن لوبغالي کې د ۷۰ لوبډلو ترمنځ د ځوانانو هڅولو او يووالي په موخه د ټېپ بال کرکټ سيالۍ د بټي کوټ شاهين لوبډلې په اتلولۍ پای ته ورسېدې.
د يادو سياليو پايلوبه د بټي کوټ شاهين او شينوارو علي کېنگ لوبډلو ترمنځ ترسره شوه، بټي کوټ شاهين لوبډلې د لوبې پچې په گټلو سره په ټاکلو لسو اورونو کې د درېيو لوبغاړو په سوځېدو سره سیالې لوبډلې ته د ۱۷۴ منډو هدف کېښود، په مقابل کې شينوارو علي کېنگ لوبډلې يواځې ۱۵۷ منډې وکړې او لوبه يې د ۱۷ منډو په توپير وبايلله.
د يادونې وړ ده، چې دغو سياليو يوه مياشت دوام وکړ او په پای کې اتلې لوبډلې ته د اتلولۍ جام ورکړل شو.
