خوست؛ د ۵۰۰ زده کوونکو ترمنځ دودیزې لوبې ترسره شوې
د خوسو ولایت د بدني روزنې او ورزش آمریت له لوري د ولس غږ ښوونځي د ۵۰۰ زده کوونکو ترمنځ د ځغاستې، رسۍ کشولو او تیږې اچولو سیالۍ ترسره شوې.
په دغو لوبو کې د ۳۵۰ زدهکوونکو ترمنځ ځغاستې سیالي په یو کیلومتري واټن کې له تڼیوال پارک څخه پیل د پروژې تر پله پورې ترسره شوه، چې په پایله کې یې هلال مبارز لومړی، ائیل الرحمن دویم او امیرالله درېیم مقام خپل کړ.
همداراز د رسۍ کشولو په سیالۍ د ۱۵ لوبډلو ترمنځ چې ۱۲۰ کسانو پکې ګډون کړی و، ترسره شوې، د درېیم الف ټولګي لومړی، شپږم ب ټولګي دویم او لسم الف ټولګي درېیم مقام خپل کړ.
په ورته وخت کې د همدې ښوونځي د زده کوونکو له لوري د پارکور نندارې او په پای کې د ۳۰ کسانو ترمنځ د تیږې اچونې سیالۍ هم ترسره شوې چې په پایله کې یې حبیب شاه لومړی، فریدالله دویم او عارف درېیم مقام ترلاسه کړ.
د سیالیو په پای کې د خوست ولایت د ورزشي آمریت او ځینو نورو خلکو له لوري غوره لوبغاړو او ګټونکو لوبډلو ته چمتو شوې ډالۍ ورکړل شوې.
