کابل کې د زندانيانو دوو لوبډلو ترمنځ د واليبال دوستانه سيالي وشوه
د المپيک، بدني روزنې او ورزش عمومي ریاست اړوند د ټولشموله ورزشونو امريت او د زندانونو چارو د تنظیم ښه ادارې د ښوونې او بيا روزنې رياست په همغږۍ د يادې ادارې د نشه يي توکو په وړاندې د مبارزې توقیف خونې امريت په ورزشي لوبغالي کې د دوو لوبډلو ترمنځ د واليبال دوستانه سيالي وشوه.
د دغو سياليو د پيل په مراسمو کې د زندانونو د چارو د تنظیم ادارې د ښوونې او بيا روزنې رئیس نظر محمد ناصري، د ورزش ادارې فني او مسلکي رئيس محمد يوسف افتخار، د هنډبال ملي فدراسيون رئيس هدایت الله کاموال، له نشه يي توکو په وړاندې د سترې محکمې رئیس مفتي احمد الله احمدي، د ټولشموله ورزشونو امر محمد عارف پیمان، د ورزش ادارې او د زندانونو چارو د تنظیم ادارې مسوولینو او ورزشکارانو ګډون کړی وو.
په دغو مراسمو کې د زندانونو چارو د تنظیم ادارې د ښوونې او بيا روزنې رئیس نظر محمد ناصري راغلو کسانو ته د ښه راغلاست ترڅنګ د لوبو چمتو کوونکو څخه مننه وکړه او له زندانيانو يې وغوښتل، چې د نشي توکو د استعمال او پېر او پلور څخه ځان وساتي او همدارنګه نوموړي زندانيانو ته د ورزش، تعلیم او حرفوي زده کړو په برخه کې د هر ډول همکارۍ ډاډ ورکړ.
ورپسې د ورزش ادارې فني او مسلکي رئيس محمد يوسف افتخار د دغو سياليو په ترسراوي خوښي څرګنده کړه، چې د ورزش عام کولو لپاره په زندانونو کې دې ته ورته سيالۍ برابريږي او ورزش يې د جسمي قوت ترڅنګ ذهني او رواني پياوړتیا لپاره مهم یاد کړ او همدارنګه د ورزش ادارې په لاسته راوړنو وغږیده او دوی ته يې د ورزش ادارې د رهبري د همکارۍ ډاډ ورکړ.
په پای کې د نشه يي توکو په وړاندې د مبارزې سترې محکمې رئیس مفتي احمد الله احمدي دغه سيالۍ زندانيانو ته د سالمې بوختیا لپاره مهمې يادې کړې او ياد زندان يې د حرفوي زده کړو د زده کولو لپاره غوره وباله، تر څو له خوشې کېدو وروسته يې يو کسب زده وي.
د دغو مراسمو په جريان کې يو د واليبال لوبغالی هم پرانيستل شو، چې په لومړۍ لوبه کې الف لوبډلې خپلې سیالې ب لوبډلې ته د ۱۵/۱۴ امتيازونو په توپير ماتې ورکړه او بریا يې خپله کړه.
يادونې وړ ده، چې د هنډبال ملي فدراسيون رئيس هدایت الله کاموال له لوري د ورزش مسوولینو ته ستاينليکونه او دواړو لوبډلو ته ورزشي توکي هم ورکړل شول.
