د اندونیزیا اسیا ملتونو جام؛ مولوي احمدالله وثیق د فوټسال ملي لوبډلې له لوبغاړو سره ولیدل
د المپیک، بدني روزنې او ورزش عمومي رئیس مولوي احمدالله وثیق د اندونیزیا په کوربتوب د اسیا ملتونو جام سیالیو په څنډه کې د فوټسال ملي لوبغاړو سره ولیدل، د سعودي عربستان پر وړاندې د دوی د بریا ستاینه یې وکړه او خپل مسوولیت ته یې متوجه کړل.
د فوټسال ملي لوبډلو لوبغاړو هم د ورزش ادارې د عمومي رئیس په لیدنه او هڅونه خوښي او ډاډ څرګند کړ، چې د مالیزیا پر وړاندې سبانۍ لوبې ته یې پوره چمتووالی نیولی او تمعه شته چې دا لوبه به هم وګټي.
د ویلو ده چې افغان فوټسال ملي لوبډلې د اندونیزیا په کوربتوب د اسیا ملتونو جام سیالیو په خپله لومړۍ لوبه کې سعودي عربستان ته د ۳ پر صفر ګولونو په توپیر ستره ماتې ورکړه.
یادې سیالۍ د اندونیزیا په کوربهتوب په جاکارتا ښار کې د ١٦ هېوادونو په ګډون د روانې میلادي میاشتې پر ٢٧مه پیل شوي او د فبروري تر ٧مې نېټې به دوام وکړي، چې افغانستان په D ګروپ کې له سعودي عربستان، مالیزیا او ایران سره سیالۍ کوي.
