کابل کې د ۲۰۰ ووشوکارانو ترمنځ د ووشو ټاکنيزې سيالۍ پيل شوې
د کابل ولايت د بدني روزنې او ورزش رياست سره په همغږۍ د ووشو ملي فدراسيون له لوري د کابل ولايت له ۵۰ کلبونو څخه د ۲۰۰ ووشوکارانو ترمنځ د دې فدراسيون په مرکزي جمنازيم کې د ووشو ټاکنيزې سيالۍ پيل شوې.
په دغه سياليو کې به ورزشکاران په درې عمري کټګوريو نويو ځوانانو، ځوانانو او لويانو کې د يو بل پر وړاندې د سيالۍ ډګر ته ښکته شي، چې په پايله کې به يې د نويو ځوانانو له کټګورۍ ۱۸ تنه، د ځوانانو له کټګورۍ ۱۶ او د لويانو کټګورۍ ۲۲ تنه د کابل ولايت په استازولۍ د افغانستان په کچه د ووشو راتلونکو مناسبتي سياليو ته غوره شي.
هېره دې نه وي، چې دغه سيالۍ د ووشو آسيايي سياليو کې د دوو مډال ګټونکو ووشوکارانو، محمد طه اسحاقي او نويد اکبري په وياړ د افغانستان په کچه د ووشو راتلونکو مناسبتي سياليو ته د کابل ولايت په کچه د غوره ورزشکارانو د موندلو په موخه پيل شوې، تر څو د کابل په استازولۍ په يادو سياليو کې ګډون وکړي، چې درې ورځې به دوام وکړي.
