د المپيک بدني روزنې او ورزش عمومي رييس شمالي ولايتونو ته د سفر په دوام د کندز ولايت له کرکټ بورډ لیدنه وکړه
د المپيک بدني روزنې او ورزش عمومي رييس مولوي احمدالله وثيق او ورسره پلاوي شمالي ولايتونو ته د خپل سفر په دوام د کندز ولايت له کرکټ بورډ لیدنه وکړه او د دغه ولايت د کرکټ له لوبغاړو او د يادې ادارې له مشر ميرويس اشرف سره يې وليدل.
ښاغلي وثيق د ياد ولايت لوبغاړو ته په سپارښتنه کې وويل، چې خپلې هڅې جاري وساتي او لکه د ملي لوبغاړو په شان هېوادوالو ته د خوښۍ ورکولو سبب جوړ شي او په راتلونکې کې له نړیوالو ډګرونو برياوې راوړي.
نوموړي همداراز په خپلو خبرو کې زياته کړه: ملي لوبغاړي هم ستاسو په څېر لوبغاړي وو، ممکن تر تاسو ورته کم امکانات برابر وو، خو د هغوی پرلپسې هڅې د دې سبب شوې، چې نن نړيوال ستوري دي، تاسو هم پوره هڅه وکړئ، چې هر يو بېل ستوری او د هېواد راتلونکی جوړ شئ.
همدارنګه ښاغلي مولوي احمدالله وثيق او ورسره پلاوي د کرکټ بورډ ادارې له مشر ميرويس اشرف سره وليدل او د کرکټ په ډګر کې يې د هغو بې درېغه هڅې وستايلې او ترڅنګ يې په نړيواله درجه بندۍ کې د افغان کرکټ ملي لوبډلې د مخکې تګ مبارکي ورکړه.
