میدان وردګ؛ چک ولسوالۍ کې د ۱۵ لوبډلو ترمنځ د غشي ویشتلو اختريزې سیالۍ پای ته ورسېدې
د میدان وردګ ولایت د بدني روزنې او ورزش آمریت اړوند د غشي ویشتلو فدراسیون د استازولۍ له لوري یاد ولایت په چک ولسوالۍ کې د ۱۵ لوبډلو ترمنځ د غشي ویشتلو اختريزې سیالۍ د محمد یارخېلو لوبډلې په اتلولي پای ته ورسېدې.
د یادو سیالیو پایلوبه د وردګ اتلانو او محمد یارخېلو لوبډلو تر منځ ترسره شوه، چې محمد یار خېلو لوبډلې د ۴۳/۲۰ نمرو په ګټلو سره خپلې سیالې لوبډلې ته ماتې ورکړه او اتلولي یې وګټله.
دا سیالۍ د کوچني اختر د نمانځلو او د سیمې د خلکو لپاره د سالمې تفرېح برابرولو په موخه ترسره شوې، چې په پای کې لومړي او دویم مقام لوبډلو ته د غشي ویشتلو یوه- یوه لیندۍ او کپونه ورکړل شول.
