ننګرهار؛ بټي کوټ ولسوالۍ کې د ٢٠ لوبډلو ترمنځ د ټېپ بال کرېکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولایت په بټي کوټ ولسوالۍ کې د ٢٠ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د چهاردهي ځوانانو او غازي آباد لوبډلو ترمنځ ترسره شوه. د لوبې پچه چهاردهي ځوانانو لوبډلې وګټله او لومړی یې توپوهنه وکړه، چې په ټاکلو لسو اورونو کې یې د اتو ویکټو په زیان خپلې سیالې لوبډلې ته د ٩٨ منډو هدف وټاکه. غازي آباد لوبډلې ټاکلی هدف د شپږو ویکټو په زيان ترلاسه کړ او د څلورو ویکټو په توپیر یې د دغو سیالیو لومړۍ لوبه وګټله.
دا سیالۍ د ځوانانو ترمنځ د یووالي او ورزش ته د ځوانانو د هڅولو په موخه پیل شوي دي، چې ١٦ ورځې به دوام وکړي.
