کابل؛ د والیبال غوره لیګ درېیم پړاو سیالیو پرانیسته ترسره شوه

د بدني روزنې او ورزش عمومي ریاست اړوند د والیبال ملي فدراسیون له لوري د یاد ریاست په ۲۵۰۰ کسیز جمنازیوم کې د اتو لوبډلو په ګډون د والیبال غوره ليګ درېیم پړاو سیالیو پرانیسته ترسره شوه.

د یاد غوره لیګ پرانیست غونډه کې د المپيک ملي کمېټې او ورزش عمومي رييس مولوي احمد الله وثيق ، د ياد رياست فني او مسلکي معاون حافظ احمد جان ځدران، ورزشي مشاور قاري حيات الله رحماني، د والیبال ملي فدراسیون سکرتر جنرال محمد ناصر نوري، د نشراتو او عامه پوهاوي ریاست رییس الله محمد اتل مشواڼي، د ملي تلویزون مسوولینو، ورزشکارانو او د والیبال ګن شمېر مینوالو ګډون کړی وو.

غونډه د قرانکریم په مبارکو ایتونو سره پیل شوه. په دغه غونډه کې د المپیک ملي کمېټې او ورزش عمومي رییس مولوي احمدالله وثیق د بدني روزنې او ورزش عمومي ریاست ټولو مسوولینو، میلمنو، ورزشکارانو او د پرانیست غونډې ټولو ګډونوالو ته ښه راغلاست وویلې او زیاته یې کړه《 ډېر د خوشحالۍ او افتخار ځای دی، چې کومه وعده او ژمنه موږ د والیبال فدراسیون له مسوولینو سره کړې وه الحمدلله موږ وتوانیدو د بدني روزنې او ورزش ریاست مسوولینو، د والیبال ملي فدراسیون مسوولینو او د ورزشکارانو په هڅه د والیبال غوره لیګ درېیم پړاو سیالۍ ترسره کړو او د ورزش ټولو فدراسیونونو ته دا وعده ورکوم هغه څه چې د بدني روزنې او سپورټ ریاست په واک او اختیار کې دي له تاسو به یې درېغ نه کړو او موږ تل کوشش کوو ، چې د ورزش د ټولو برخو لوبغاړي د دې جوګه شي، چې په نړیوالو میدانونو کې ولوبیږي او د افغانستان لپاره ښې لاسته راوړنې ولري او پای کې د ملي راډیو تلویزون له مشرتابه څخه مننه کوم چې د والیبال غوره لیګ درېیم پړاو سیالۍ په ژوندۍ بڼه نشروي.》

د غونډې په دوام د والیبال ملي فدراسیون سکرتر جنرال محمد ناصر نوري وویل:《 د بدني روزنې او سپوټ ریاست څخه مننه، چې موږ سره د والیبال ورزش په برخه کې هر ډول مرسته کړې او سږ کال موږ سره د والیبال غوره لیګ درېیم پړاو کې د هندوکش او پامیر لوبډلې زیاتې شوي همدارنګه پر محمد اسداللهی روزونکي سربېره د ایران دوه نور نړیوال لوبڅاران استاد رضا حاجي نژاد او سید محمد موسوي لوبڅاري ترسره کوي ، چې دا د تېرو لیګونو په پرتله یو نوښت دی او په پای کې باید ووایم چې والیبال فدراسیون تاسو ته د ورزش په برخه کې هر ډول مرستو وعده کوي.》

په دغه غوره لیګ کې " ام البلاد، سپین غر، نښتر، پامیر، بالاحصار، بُست، هندوکش او نګیني هریوا " لوبډلې په دوو ګروپونو کې، چې په هر ګروپ کې څلور _ څلور لوبډلې برخه لري سیالۍ کوي. لومړۍ لوبه یې نن د نګیني هریوا او د بست لوبډلو ترمنځ ترسره شوه، چې په پایله کې بست لوبډلې خپلې سیالې نګیني هریوا لوبډلې ته د ۳/۰ میدانونو په توپیر ماتې ورکړه او لومړۍ بریا یې خپله کړه.

هېره دې نه وي دغه سیالۍ د ملي تلویزون له لارې په ژوندۍ بڼه خپرېږي چې اته ورځې به دوام وکړي.