ننګرهار؛ دور بابا ولسوالۍ کې د ۲۵ لوبډلو ترمنځ د ټېپ بال کرېکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرېکت فدراسیون د استازولي له لوري د یاد ولایت په دور بابا ولسوالۍ کې د ۲۵ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د ګوړکو سوپر سټار او ګوړکو ینګ سټار لوبډلو ترمنځ ترسره شوه. د لوبې پچه ګوړکو سوپر سټار لوبډلې وګټله او لومړی یې توپوهنه وکړه، چې په ټاکلو اتو اورونو کې یې د خپلو شپږو لوبغاړو په له لاسه ورکولو سره خپلې سیالې لوبډلې ته د ۸۹ منډو هدف وټاکه. ینګ سټار لوبډلې ټاکلی هدف د خپلو دوو لوبغاړو په له لاسه ورکول سره ترلاسه کړ او د اتو ویکټو په توپیر یې د دغو سیالیو لومړۍ لوبه وګټله.
دا سیالۍ د سیمې د ځوانانو ترمنځ د یووالي په موخه پیل شوي دي، چې یوه میاشت به دوام وکړي.
