کابل کې د تکواندو یوولسم پړاو ټاکنیزې سیالۍ پای ته ورسېدې
د المپیک کمېټې، بدني روزنې او ورزش لوی ریاست اړوند د تکواندو ملي فدراسیون له لوري د تکواندو یوولسم پړاو ټاکنیزې سیالۍ چې درې ورځې مخکې په پلازمېنه کابل کې پیل شوې وې، نن پای ته ورسېدې.
په دغو سیالیو کې د هېواد له ۲۸ ولایتونو څخه څه باندې ۲۰۰ ورزش کارانو د مشرانو ورزشکارانو په عمري او له ۵۴ تر ۱۰۰+ اتو بېلابېلو وزني کټګوریو کې ګډون کړی وو، چې په پایله کې یې ۳۲ تنه د تکواندو ملي لوبډلې ته وټاکل شول.
د یادو سیالیو د پای په مراسمو کې د بدني روزنې او ورزش لوی رئیس مولوي احمدالله وثیق، د یاد ریاست فني او مسلکي مرستیال حافظ احمدجان ځدراڼ، د تکواندو ملي فدراسیون رئیس نجیب الله سکندر، ورزشکارانو او د ورزش ګڼو مینوالو ګډون کړی وو.
د یادونې وړ ده، چې په دغو سیالیو کې کابل لومړی، په ایران کې مېشتو افغان مهاجرینو دویم او تخار ولایت بیا درېیم مقام ترلاسه کړ.
