پروان؛ مرکز چاریکار کې د ۱۱ لوبډلو ترمنځ د فوټبال غوره لیګ سیالۍ پای ته ورسېدې
د پروان ولایت د بدني روزنې او ورزش امریت اړوند د فوټبال ملي فدراسیون د استازولۍ له لوري د یاد ولایت په مرکز چاریکار ښار کې د ۱۱ لوبډلو ترمنځ د فوټبال غوره لیګ سیالۍ د نعمان لوبډلې په اتلولۍ پای ته ورسېدې.
د دغو سیالیو پایلوبې ته د فوټبال ملي فدراسیون رئیس محمد یوسف کارګر، د یاد فدراسیون ورزشي مشاور دین محمد ساپی، د پروان ورزشي امریت رهبري، لوبغاړي او زیات شمېر مینوال راغلي وو.
د دغو سیالیو په پایلوبه کې د نعمان لوبډلې خپلې سیالې وحدت خواجه سیاران لوبډلې ته د ۲/۰ ګولونو په توپیر ماتې ورکړه او اتلولي یې خپله کړه.
په دغو سیالیو کې پرویز میرزاد غوره لوبغاړی، راشد ضیا د ډېرو ګولونو وهونکی او شعیب امید غوره ګول ساتونکی وپېژندل شو.
د یادو سیالیو موخه د پروان ولایت په کچه غوره لیګ ته د غوره لوبغاړو او لوبډلې موندل و، چې درې اوونۍ یې دوام وکړ.
د سیالیو په پای کې د پروان ورزشي امریت له لوري غوره لوبغاړو او لوبډلې ته بېلا بېلې ورزشي ډالۍ ورکړل شوې.
