کونړ؛ نرنګ ولسوالۍ کې د ټېپ بال کرکټ سيالۍ د چيلنجر لوبډلې په اتلولۍ پای ته ورسېدې
د کونړ ولايت د بدني روزنې او ورزش امریت له لوري د نرنګ ولسوالۍ په بر نرنګ ورزشي لوبغالي کې د ۱۶ لوبډلو ترمنځ د رمضان جام په نوم د ټېپ بال کرکټ سیالۍ، چې دولس ورځې وړاندې پیل شوې وې، د چیلنجر لوبډلې په اتلولۍ پای ته ورسېدې.
د دغو سیالیو پایلوبه کې د چلینجر ښوونیزې اکاډمۍ لوبډلې په ټاکلو اتو اورونو کې د پنځه ویکټو له لاسه ورکول سره خپلې سیالې کریمزي لوبډلې ته د ۱۱۴ منډو هدف وټاکه په مقابل کې کریمزي لوبډلې په اتو اورونو کې د پنځه ویکټو له لاسه ورکول سره یوازې ۱۱۰ منډې جوړې کړې او سیالي یې د ۴ منډو په توپیر و بایلله.
د سیالیو په پای کې د کونړ ولایت د بدني روزنې او ورزش امریت له لوري غوره لوبغاړو ته د لوبغاړو د هڅوونې په موخه چمتو شوې ډالۍ ورکړل شوې.
