خوست؛ د ټېپ بال کرېکټ صحراوال لیګ اووم پړاو ۲۰ ورځنۍ سیالۍ پیل شوې
د خوست ولایت د بدني روزنې او ورزش آمریت اړوند په صبریو ولسوالۍ کې د شپږو لوبډلو ترمنځ د ټېپ بال کرېکټ صحراوال لیګ اووم پړاو سیالۍ پیل شوې، چې ۲۰ ورځې به دوام وکړي.
صحراوال لس اوریزه لیګ دی، چې په لومړۍ لوبه کې یې صحرا فرېنډز او صحرا زلمیو لوبډلې سره مخ شوې. صحرا فرېنډز لوبډلې په ټاکلو لسو اورونو کې د ۷ لوبغاړو په سوځېدو ۸۸ منډې وکړې، چې مقابلې لوبډلې یاد هدف په اووم اور کې د پنځو لوبغاړو په سوځېدو پوره او د لومړۍ لوبې ګټونکې شوه.
د صحراوال لیګ پرانېستو مراسمو کې د خوست ولایت ورزشي مسوولینو، لوبغاړو او د کرېکټ لوبې ګڼو مینه والو ګډون درلود.
د یادونې ده، چې صحراوال لیګ د صبریو ولسوالۍ په صحرا کلي کې هر کال ترسره کېږي.
