د کابل ښار د کلاسيک پاورلفټنګ شپږم پړاو ټاکنيزې سيالۍ پيل شوې
د بدني روزنې او ورزش عمومي ریاست په ٥٠٠ کسيز ورزشي جمنازيوم کې د کابل کلاسيک پاورلفټنګ منتخبې لوبډلې د ټاکلو سيالۍ پيل شوې.
د دغو سياليو د پيل په مراسمو کې د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، د پاورلفټنګ فدراسیون مسوولينو او ورزشکارانو شتون درلود.
په دغو سياليو کې د نوي ځوانانو، ځوانانو، لويانو مخکښانو کټګوريو کې په څلور وزنونو کې له ٥٣ څخه تر ١٢٠ کيلو وزن کې د اوو کلبونو ٨٦ ورزشکارانو په ګډون په درېيو سبکونو اسکوات، پنج پرس او دولفت کې پيل شوې.
يادې سیالۍ، چې درې ورځې به دوام وکړي، موخه يې د پاورلفټنګ د ورزش وده او د کابل منتخبې لوبډلې ټاکل دي.
په يادو سياليو کې به تر ٢٧٠ کيلو وزن پورې سيالۍ وشي، چې په ترڅ کې به يې ٢٧ تنه د کابل منتخبې لوبډلې ته وټاکل شي.
د پاورلفټنګ فدراسیون د معلوماتو له مخې دغه ورزشکاران به د زمري په ٢٥ نېټه د پاورلفټنګ فدراسیون ملي لوبډلې د غوراوي سياليو کې ګډون وکړي.
