په کابل کې د میرویس خان جام د بوکسنګ شپږم پړاو سیالۍ ترسره شوې
د بدني روزنې او ورزش عمومي ریاست اړوند بوکسنګ تمریناتي ځای کې د هوتکو ټولنې له لوري د ۱۵ کلبونو د ۶۰ ورزشکارانو ترمنځ د میرویس خان جام د بوکسنګ شپږم پړاو سیالۍ ترسره شوې.
دغه سیالۍ چې د کابل د ۱۲ کلبونو ترڅنګ د ننګرهار ولایت د درې کلبونو ۲۵ ورزشکارانو هم پکې ګډون کړی درلود، د پای په مراسمو کې یې د بوکسینګ فدراسیون مسؤلینو، د هوتکو ټولنې استازو، ورزشکارانو او ګڼو مینوالو هم ګډون کړی و.
یادې سیالۍ د هوتکو ټولنې د بوکسنګ کلبونو د ورزشکارانو ترمنځ په درېیو کټګوریو نویو ځوانانو، ځوانانو او لویانو په مختلفو وزنونو کې ترسره شوې او موخه یې د بوکسنګ په برخه کې د ورزشکارانو ترمنځ د تجربو شریکول، د بوکسنګ ورزش وده او د غوره ورزشکارانو موندل وو.
د یادونې وړ ده چې د دغو سیالیو د پای په مراسمو کې غوره ورزشکارانو ته مډالونه او ستاینلیکونه هم ورکړل شول.
