د بغلان او سرپل لوبډلو د وزلوبې ټورنمنټ پایلوبې ته لار ومونده
په بلخ کې د وزلوبې سیالیو په دوام نن دوشنبه د څلورو لوبډلو ترمنځ د نیمه پایلوبې دوه سیالۍ ترسره شوې، چې ورسره د پایلوبې لوبډلې هم معلومې شوې.
د نن ورځې لومړنۍ سیالي د بلخ او سرپل لوبډلو ترمنځ وشوه، چې یاده لوبه په ټاکلي وخت کې ۲ – ۲ مساوي پای ته ورسېده؛ خو په اضافي وخت کې سرپل یو بل امتیاز هم ترلاسه کړ او پایلوبې ته یې لار ومونده.
په دې سیالي کې نجیب او سرور یوـ یو امتیاز د بلخ لپاره او همدا راز جاوېد دوه او خلیل پهلوان یو امتیاز د سرپل په نوم ثبت کړ.
دویمه نیمه پایلوبه بیا د بغلان او بدخشان لوبډلو ترمنځ ترسره شوه، چې دا سیالي په ټاکلي وخت کې د ۲ – ۱ امتیازونو په توپیر بغلان لوبډلې وګټله.
په دې سیالي کې سعد الحق او فضل یوـ یو امتیاز د بغلان لپاره او بصیر بابا عاشور بیا یو امتیاز د بدخشان لپاره واخیست.
د بلخ او بدخشان لوبډلې به د سه شنبې په سهار لس بجې د درېیم مقام لپاره د سیالۍ ډګر ته ښکته شي او ګټونکې لوبډله به د روان ټورنمنټ درېیم مقام خپل کړي.
د بغلان او سرپل لوبډلو ترمنځ به د پایلوبې سیالي د سه شنبې په ورځ له غرمې وروسته په یوه نیمه بجه په مزارشریف کې د حاجي مقیم بای د وزلوبې په لوبغالي کې ترسره شي.
