د کابل ولايت سرې مياشتې لوبډلې د باسکټبال درې کسيزه سياليو اتلولي وګټله
د باميان ولايت د بدني روزنې او ورزش امريت په همکارۍ د دې ولایت د باسکټبال ملي فدراسيون د استازولۍ له لوري د ياد ولايت په مرکز کې له کابل، هرات، ننګرهار، غور او باميان ولايتونو څخه د ۱۳ لوبډلو ترمنځ درې ورځې وړاندې، د باسکټبال پيل شوې، درې کسيزه (۳×۳) سيالۍ، د کابل ولايت د سرې مياشتې باسکټبال لوبډلې په اتلولۍ پای ته ورسېدې.
د دې سياليو پايلوبه کې د کابل سرې مياشتې لوبډلې خپلې سیالې د کابل هريرود لوبډلې ته د ۲۱ - ۱۱ نمرو په توپير ماتې ورکړه او اتلولي يې وګټله.
دغه راز په دې سياليو کې د کابل سرې مياشتې لوبډلې لومړی مقام، د کابل هريرود لوبډلې دويم مقام او د هرات MNS Auto 1 لوبډلې درېيم مقام وګاټه.
دغه سيالۍ د باسکټبال (FIBA 3×3) نړيوال رسمي فدراسيون له لارې د ورزشکارانو د سالمې تفرېح، د باسکټبال ورزش ته د ودې او د ځوانو استعدادونو د موندنې په موخه پيل شوي وې، چې درې ورځې يې دوام وکړ.
