ننگرهار؛ گوشتې ولسوالۍ کې د ۲۲ لوبډلو ترمنځ د ټېپ بال کرېکټ سیالۍ پای ته ورسېدې
د ننگرهار ولايت د بدني روزنې او ورزش رياست په همغږۍ د گوشتې ولسوالۍ په ماما خېلو سيمه کې د ۲۲ لوبډلو ترمنځ د MPL ټېپ بال کرېکټ سیالۍ د ماما خېلو الف سټار لوبډلې په اتلولۍ پای ته ورسېدې.
د يادو سياليو پايلوبه د ماما خېلو الف سټار او ماما خېلو ځوانانو لوبډلو ترمنځ وشوه، د لوبې پچه ماما خېلو الف سټار لوبډلې وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۶ لوبغاړو په سوځېدو سره خپلې سيالې لوبډلې ته د ۱۳۳ منډو هدف کېښود، په ځواب کې ماما خېلو ځوانانو لوبډلې د ټولو اورونو په لوبولو سره ۱۰۳ منډې وکړې او لوبه يې د ۳۰ منډو په توپير وبايلله.
دا سیالۍ ټېپ بال کرېکټ ورزش ته د ودې ورکولو او د ځوانانو د يووالي په موخه وشوې، چې ۱۰ ورځې يې دوام وکړ.
