کابل کې د ۱۹۳ ورزشکارانو ترمنځ د بدن ښکلا او فټنيس سيالۍ پيل شوې
د کابل ولايت د بدني روزنې او ورزش ریاست سره په همغږۍ د بدن ښکلا او فټنيس مل فدراسيون له لوري د کابل ښار د لوديځ زون د ۴۱ کلبونو څخه د ۱۹۳ ورزشکارانو ترمنځ د بدن ښکلا او فټنيس نوولسم پړاو ټاکنيزې سيالۍ، د هېواد ورزش ادارې په زورخانهيې جمنازيوم کې پيل شوې.
يادې سيالۍ په دوو برخو د بدن ښکلا او فټنيس او د ۵۵ څخه تر +۹۰ کيلو ګرام وزني کټګوريو کې پيل شوې، چې په پايله کې يې ۵۰ تنه په بدن ښکلا برخه کې، ۲۵ تنه د فټنيس په سپورټ فزيک برخه کې او ۲۵ تنه بیا د فټنيس په اتلاتيک فزيک برخه کې د کابل ښار د لوديځ زون په کچه لوبډلې ته وټاکل شول.
د ويلو ده، چې يادې سيالۍ د کابل ښار د لوديځ زون په کچه د غوره ورزشکارانو پېژندلو په موخه د ورزش ادارې عمومي رئیس مولوي احمد الله وثیق، د دې ادارې فني او مسلکي مرستیال حافظ احمد جان ځدراڼ،د المپیک کمېټې معاون او د دې فدراسیون رئیس باور خان هوتک، ورزشي مسؤلینو، ورزشکارانو او ګڼ شمير مينوالو په شتون کې پيل شوې، چې يوه ورځ یې دوام وکړي.
