جوزجان ولايت کې ۲۰۰ تنو ته د فکري روزنې اصلاحي سیمینار ترسره شو
د المپیک، بدني روزنې او ورزش عمومي ریاست اړوند د دعوت او ارشاد ریاست له لوري د جوزجان ولایت د بېلابېلو فدراسیونونو ۲۰۰ ورزشکارانو او مسوولينو ته د فکري روزنې دوه ورځنی اصلاحي سیمینار پای ته ورسېده.
ياد سیمینار د المپیک، بدني روزنې او ورزش عمومي ریاست د دعوت او ارشاد رئیس مفتي دادمحمد بریال عطایي او د ياد ریاست د پلان او ستراتيژۍ سلاکار مولوي ګلاب‌الدین خپلواک له لوري وړاندې شو، چی په کې د دیني ارزښتونو، اسلامي اخلاقو، سالم فکر، ورزشي انضباط او د ورزشکار د فردي او ټولنیز مسؤولیت په اړه ګټور موضوعات تشريح او وړاندې شول.
د یادونې وړ ده، چې ياد سيمينار د ورزشکارانو د فکري، اخلاقي او اصلاحي ظرفيت لوړونې په موخه د جوزجان ولايت د ورزشي مسوولینو او د بېلابېلو فدراسینونو ورزشکارانو په ګډون ترسره شو، چې په پای کې ټولو ګډونوالو ته تصدیق پاڼې هم ورکړل شوې.
