کابل کې د ۱۰۰ ورزشکارانو ترمنځ د واکو کيک بوکسينګ دويم پړاو ټاکنيزې سيالۍ پيل شوې
د کابل ولايت د بدني روزنې او ورزش رياست سره په همغږۍ د کيک بوکسينګ ملي فدراسيون له لوري د کابل ښار له ۳۰ کلبونو څخه د ۱۰۰ ورزشکارانو ترمنځ د کابل ولايت د واکو کيک بوکسينګ دويم پړاو ټاکنيزې سيالۍ، د هېواد ورزش ادارې په دوه زره ۵۰۰ کسيز جمنازيم کې پيل شوې.
په دې سياليو کې به ورزشکاران د لويانو عمري کټګورۍ په ۱۱ بېلابېلو وزنونو کې سيالۍ ترسره کړي، چې په پای کې به يې ۲۲ تنه د کابل ولايت د واکو کيک بوکسينګ منتخبې لوبډلې ته وټاکل شي.
د ويلو ده، چې دغه دوه ورځنۍ سيالۍ د کيک بوکسينګ ملي فدراسيون سرپرست رئیس شير محمد هاشمي، د هېواد ورزش ادارې او د دې فدراسيون ورزشي مسوولينو، ورزشکارانو او يو شمير مينه والو په شتون کې، د واکو کيک بوکسينګ ملي لوبډلې ته د غوره څېرو موندلو او ټاکلو په موخه پيل شوې، چې په پايله کې به يې ۲۲ ورزشکاران د کابل ولايت د واکو کيک بوکسينګ منتخبې لوبډلې ته وټاکل شي.
