د کورش دوه کسيزه ملي لوبډله له اسيايي سياليو ډک لاس هېواد ته راستنه شوه
د کورش ملې لوبډلې دوه لوبغاړي، محمد يحيی محمدي او روح الله نظري د بحرين په کوربتوب د نويو ځوانانو درېيم پړاو اسيايي سياليو کې دوه د برنزو مډالونو له ګټلو وروسته هېواد ته راستانه شول، چې د هېواد ورزش ادارې د رهبرۍ غړو، ورزشي مسوولينو او هېوادوالو له لوري يې تود هر کلی وشو.
د نويو ځوانانو اسيايي سياليو کې روح الله نظري په ۸۳ کیلو ګرامه وزن کې خپل قرغیزستاني سیال ته ماتې ورکړه، خو په نيمه پايلوبه کې يې له خپل ايراني سيال ماتې وخوړه او د برنزو مډال يې وګاټه.
دغه راز، محمد يحيی محمدي هم د دغو سیالیو په ٦٥ کیلو ګرامه وزن کې خپلو ټایلنډي او ترکمنستاني سیالانو ته په ماتې ورکولو د برنزو مډال وګاټه او نن ( چهارشنبه، دتلې ۳۰مه ) دواړه د دوو برنزو مډالونو له ګټلو وروسته هېواد ته راستانه شول.
د نویو ځوانانو درېیم پړاو آسيايي سیالۍ د بحرین په کوربتوب د ۴۵ هېوادونو په ګډون ترسره کېږي، چې له افغانستان څخه په دې سياليو کې د اتو بېلابېلو ورزشي رشتو ورزشکارانو ګډون کړی دی.
