کابل؛ د ۱۲۰ ورزشکارانو ترمنځ د رزمي ورزشونو د کیمپو سبک ټاکنیزې سیالۍ پیل شوې
د المپیک بدني روزنې او ورزش عمومي ریاست اړوند د رزمي ورزشونو ملي فدراسیون له لوري د ۱۲۰ ورزشکارانو ترمنځ د کیمپو سبک ټاکنیزې سیالۍ پیل شوې، چې په پایله کې به د کابل په کچه ۳۲ لوبغاړي وټاکل شي.
دغه سیالۍ چې دوه ورځې به دوام وکړي، د تنکیو ځوانانو، نویو ځوانانو، ځوانانو او لویانو په عمري کټګوریو کې ترسره کېږي او په هر سبک کې به اته ورزشکاران چې ټولټال ۳۲ کسه کېږي د کابل ولایت په کچه منتخبې لوبډلې ته وټاکل شي او په راتلونکې که به د یاد ولایت په استازولۍ په ملي لوبو کې لوبېږي.
هېره دې نه وي، چې د رزمي ورزشونو ملي فدراسیون د کیمپو سبک ټاکنیزي سیالۍ د لومړي ځل لپاره ترسره کېږي او تمعه ده، چې په ولایتونو کې به هم خپلې ټاکنیزې سیالۍ ترسره کړي.
