کابل؛ د ۸۰ بايسکل ځغلونکو ترمنځ د ګلبهار انوسټمنټ د افغانستان بايسکل ځغلونې سياليو د پای مراسم ترسره شول

د المپيک. بدني روزنې او ورزش عمومي رياست اړوند د بايسکل ځغلونې ملي فدراسيون له لوري او د ګلبهار انوسټمنټ شرکت په مالي ملاتړ د کابل ښار د ملک اصغر له څلور لارې څخه تر جلال اباد ښار پورې د ۵۰ بايسکل ځغلونکو ترمنځ د بايسکل ځغلونې دوستانه سيالۍ او د ۳۰ تنو د بايسکل د فري سټايل د نمايشاتو د پای مراسم په ګلبهار سنټر کې ترسره شول.

د دې سياليو د پای په مراسمو کې د هېواد ورزش ادارې مالي او ادارې رئيس مولوي عبدالناصر هاشمي، د المپيکي چارو رئيس داد محمد پاينده اختري، ورزشي مشاور قاري حيات الله رحماني، د دفتر رئیس مولوي فضل الرحمن بري، د نشراتو رئيس اتل مشواڼي، د ګلبهار انوسټمنټ شرکت اجرايوي رئيس غلام رباني رباني، د بایسکل ځغلونې ملي فدراسيون سرپرست رئيس سيد نبي الله سادات، ورزشي مسوولينو ،ورزشکارانو او د رسنيو استازو ګډون کړی و.

دغې غونډې ته د وينا پر مهال، د المپيکي چارو رئيس داد محمد پاينده اختري وويل، خوښ يم، چې د هېواد يو خصوصي سکتور د ورزش، د دا ډول برنامې مالي ملاتړ کړی دی او زياته يې کړه، چې زه په نورو خصوصي سکتورونو هم غږ کوم،چې د ګلبهار انوسټمنټ شرکت په څير د هېواد ورزشکارانو مالي ملاتړ وکړي.

همدارنګه د ګلبهار انوسټمنټ شرکت اجرايوي رئيس غلام رباني رباني ټولو ګډونوالو ته د ښه راغلاست ترڅنګ وويل، اوس په افغانستان کې ورزش د تېرو کلونو په پرتله زيات پرمختګ کړی دی او ډاډ يې ورکړ، چې موږ به په راتلونکي کې هم د خپلو ورزشکارانو ملاتړ ته دوام ورکړو.

دغه سيالۍ د روانې تلې میاشتې پر ۱۸مه نېټه د کابل، ميدان وردګ، لوګر، ننګرهار او لغمان ولايتونو د ۵۰ بايسکل ځغلونکو ترمنځ د کابل ښار څخه تر جلال اباد پورې په دوو جلا سبکونو سرکوي ( جاده يي) او غرني (کوهستاني) کې ترسره شوه او تر څنګ يې د ۳۰ تنو له لوري د بايسکل د فري سټايل سبک ورزشي نندارې وړاندې شوې، چې په پايله کې يې محمد شريف يعقوبي لومړی، نقيب الله توتاخېل دويم او سعيد الله سادات بيا درېيم مقام خپل کړی وو، چې نن د ګلبهار انوسټمنټ شرکت له لوري ټولو ګډونوالو ورزشکارانو ته ستاينليکونه او ډالۍ او لومړي، دويم او درېيم مقام ګټونکو ته بیا کپونه، ستاينليکونه، نغدي او بېلابېلې ډالۍ ورکړل شوې.

د ويلو ده، چې يادې سيالۍ د بايسکل ځغلونې راتلونکو سياليو ته د بايسکل ځغلونکو د لا ښه چمتوالي په موخه ترسره شوې وې، چې يوه ورځ يې دوام کړی و.