پکتيکا کې د څلورو لوبډلو ترمنځ د ټېپ بال کرکټ سيالۍ پای ته ورسېدې
د پکتیکا ولایت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د ياد ولايت په مرکز مسواس سيمه کې د څلورو لوبډلو ترمنځ د ټېپ بال کرکټ سيالۍ، چې دوې ورځې يې دوام وکړ د ذهين لوبډلې په اتلولۍ پای ته ورسېدې.
د يادو سياليو پايلوبه د ذهين او ادريس لوبډلو ترمنځ ترسره شوه، د لوبې پچه ذهين لوبډلې وگټله او لومړی يې د توپ وهنې پریکړه وکړه، چې په ټاکلو لسو اورونو کې يې د اتو لوبغاړو په سوځېدو سره سيالې لوبډلې ته د ۱۶۲ منډو هدف وټاکه، په مقابل کې ادريس لوبډلې د ټولو اورونو په لوبولو سره يواځې ۱۰۲ منډې وکړې او لوبه يې د ۶۰ منډو په توپير وبايلله.
د ويلو وړ ده، چې د دغو سیالیو موخه د ځوانانو ترمنځ يووالی رامنځته کول او له نشه يي توکو څخه يې ليری والی وو.
