زابل کې د ۳۰ ورزشکارانو ترمنځ د پارکور غوراوي سيالۍ ترسره شوې
د زابل ولايت د بدني روزنې او ورزش آمريت اړوند د پارکور فدراسيون د استازولۍ له لوري د ياد په مرکز قلات ښار کې د ۳۰ ورزشکارانو ترمنځ په ځوانانو، نويو ځوانانو او مشرانو عمري کټگوريو کې د پارکور غوراوي سيالۍ ترسره شوې.
دغه سیالۍ چې يوه ورځ يې دوام وکړ، په پايله کې له هرې کټگورۍ نه دوه ورزشکاران، چې ټول شپږ تنه کېږي، د ياد ولايت پارکور منتخبې لوبډلې ته غوره شول.
ياده دې وي، چې د دغو سياليو په پای کې د ياد ولايت د ورزش آمريت له لوري غوره ورزشکارانو ته کپونه او مډالونه ورکړل شول.
