کندز؛ په قلعه ذال ولسوالۍ کې د نهو لوبډلو ترمنځ د فوټبال سيالۍ پای ته ورسېدې
د کندز ولايت د بدني روزنې او ورزش رياست اړوند د فوټبال ملي فدراسیون د استازولۍ له لوري د ياد ولايت په قلعه ذال ولسوالۍ کې د نهو لوبډلو ترمنځ د فوټبال سيالۍ د ينگي ارق اتحاد لوبډلې په اتلولۍ پای ته ورسېدې.
په دغو سياليو کې له مرکز، گلتېپې او قلعه ذال ولسواليو څخه لوبډلو گډون کړی وو، چې په پايلوبه کې ينگي ارق اتحاد لوبډلې خپلې سيالې ينگي ارق بيرليشک لوبډلې ته د ۴ پر ۳ گولونو په توپير ماتې ورکړه او اتلولي يې په خپل نوم کړه.
د يادونې وړ ده، چې د يادو سياليو د ترسره کېدو موخه ورزش ته د ځوانانو هڅول وو، چې دوې ورځې يې دوام وکړ.
