ننگرهار؛ روداتو ولسوالۍ کې د ۱۴ لوبډلو ترمنځ د رمضان جام په نوم د ټېپ بال کرېکټ سيالۍ پيل شوې
د ننگرهار ولايت د بدني روزنې او ورزش رياست اړوند د ټېپ بال کرېکټ فدراسيون د استازولۍ له لوري د ياد ولايت په روداتو ولسوالۍ کې د ۱۴ لوبډلو ترمنځ د ااا له نظام څخه د ملاتړ په موخه د رمضان جام په نوم د ټېپ بال کرېکټ سيالۍ پيل شوې.
د يادو سياليو لومړنۍ لوبه د بانډې ځوانانو او حصار شاهي تندر لوبډلو ترمنځ ترسره شوه، بانډې ځوانانو لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو ۱۲ اورونو کې يې د څلورو لوبغاړو په سوځېدو سره سيالې لوبډلې ته د ۱۲۵ منډو هدف وټاکه، په مقابل کې حصار شاهي تندر لوبډلې ياد هدف د دوو لوبغاړو په سوځېدو سره په شپږم اور کې ترلاسه کړ او لوبه یې د اتو ویکټو په توپير وگټله.
د يادولو وړ ده، چې دغه سيالۍ به دوې اوونۍ دوام وکړي.
