کابل کې د ١٠٠ سوک وهونکو ترمنځ د سوک وهنې سیالۍ ترسره شوې
د المپیک، بدني روزنې او ورزش لوی ریاست اړوند د سوک وهنې ملي فدراسیون له لوري د څلورو ولایتونو (کابل، لغمان، کونړ او ننګرهار) څخه د ١٠٠ تنو سوک وهونکو ترمنځ د هوتک جام په نوم د سوک وهنې اتم پړاو سیالۍ ترسره شوې.
په دغو سياليو کې ٤٠ تنو له کابل، ٣٠ تنو له ننګرهار، ٢٠ تنو له لغمان او لس تنو له کونړ ولایت څخه ګډون کړی وو، چې له ٣٥ کيلوګرامه څخه تر +٧٥ کیلو ګرامه وزني او د تنکیو ځوانانو، ځوانانو او نویو ځوانانو په عمري کټګوریو کې ترسره شوې.
د سياليو په پایله کې کابل د ٢٠ امتيازونو په ترلاسه کولو سره لومړی، ننګرهار د ١٨ امتيازونو په ترلاسه کولو سره دويم او لغمان د ١٢ امتيازونو په ترلاسه کولو سره درېیم مقام ترلاسه کړ.
د يادو سیالیو موخه د سوک وهنې لوبې وده او د لوبغاړو ترمنځ پېژندګلوي وه، چې یوه ورځ یې دوام وکړ.
