په خوست کې د ۲۸ لوبډلو ترمنځ د ټېپ بال کرکټ معارف جام سیالۍ پیل شوې
د خوست ولایت په مرکز تڼيوال پارک کې د مدرسو او ښوونځیو په کچه د ۲۸ لوبډلو ترمنځ د ټېپ بال کرکټ معارف جام سیالۍ پیل شوې.
د دغو سیالیو د پیل لوبه د الازهر خصوصي ښوونځي او نهرالعلوم مدرسې د لوبډلو ترمنځ ترسره شوه، د لوبې لومړۍ پاڼۍ د نهرالعلوم مدرسې لوبډلې ولوبوله او په ټاکلو لسو اورنو کې یې سیالې لوبډلې ته ۹۵ منډې هدف کېښود، بل لوري ته الازهر خصوصي ښوونځي یاد هدف د پنځو لوبغاړو په سوځېدو په نهم اور کې پوره کړ او سیالي یې وګټله.
هېره دې نه وي، چې دغه سیالۍ د نصیر ځواک، ضیاءالله او یون اورښت له لوري جوړې شوې، د لیګ په شکل ترسره کېږي او یوه میاشت به دوام وکړي.
