غزني؛ جاغوري کې د ۲۰۰ ورزشکارانو ترمنځ بېلابېلې رزمي سیالۍ ترسره شوې
د غزني د ورزش امریت په همغږۍ ددې ولایت په جاغوري ولسوالۍ کې د ۲۰۰ ورزشکارانو ترمنځ د درېیمې جشنوارې په مناسبت د رزمي لوبو کانفو، بکس او وشو سیالۍ ترسره شوې.
دا سیالۍ د یوې ورځې په مخه وشوې، چې کانفو برخه کې حمزه سپورټس کلب لومړی او د امید ځوانانو سپورټس کلب دویم مقام خپل کړ.
د رزمي سیالیو په بکس برخه کې ميهن سپورټس کلب لومړى، جاغوري سپورټس کلب دويم او ميلاد نور سپورټس کلب دريم مقام خپل کړ.
بل پلو، ددې سیالیو په ووشو برخه کې مولا علي کلب ددې سیالیو اتل شو.
د دې سیالیو د ترسره کولو موخه د خواخوږۍ رامنځته کول او د رزمي لوبو وده وه چې په وروستیو کې غوره لوبغاړو ته کپونه، مډالونه او ستاینلیکونه ورکړل شول.
