زابل؛ په مرکز قلات ښار کې د ټيپ بال کرکټ سيالۍ د باکورزو لوبډلې په اتلولۍ پای ته ورسېدې
د زابل ولايت د مرکز قلات اړوند باکورزو کلي کې د اتو لوبډلو ترمنځ د ټيب بال کرکټ سياليو اتلولي د باکورزو لوبډلې خپله کړه.
دغه سيالۍ چې شپږ ورځې يې دوام وکړ، پايلوبې ته يې د باکورزو او خارجوی لوبډلو لار موندلې وه، چې په پايله کې باکورزو لوبډلې خپلې سيالې لوبډلې ته په شپږو ويکټو ماتې ورکړه او اتلولي يې خپله کړه.
د نوموړو سياليو مالي لګښت د ياد ولايت ورزشي امريت او ورزشکارانو په غاړه اخيستی و.
بايد يادونه وشي چې په پای کې غوره لوبډلو او لوبغاړو ته د ياد ولايت د ورزشي مسولينو له لوري کپونه، ورزشي توکي او ستاينليکونه ورکړل شول.
