بغلان کې د ۳۰ جوړو ترمنځ د محلي غېږنیونې سیالۍ وشوې
د بغلان ولایت د ورزشي آمریت او کورش فدراسیون له لوري د یاد ولایت او کندز د ۳۰ جوړو ترمنځ د محلي غېږنیونې سیالۍ وشوې.
دا سیالۍ د بغلان ولایت ډنډغوري ولسوالۍ شهر نو سیمه کې د یوې ورځې لپاره ترسره شوې، چې د دواړو ولایتونو د فدراسیونو د مسؤلینو ترڅنګ پکې د ورزش ګڼ شمېر مینوالو هم ګډون کړی وو.
د دې سیالیو موخه ورزش ته د ځوانانو هڅول او د دواړو ولایتونو د ورزشکارانو ترمنځ سالم رقابت وو.
یاده دې وي چې د یادو سیالیو په پای کې غوره ورزشکاران د مسؤلینو له لوري وستایل شول او مالي ملاتړ یې هم وشو.
