خوست: نسیم منګل خوست ته ستره بریا ور په برخه کړه.
د وزیر محمد اکبرخان دویمه درجه ولایتي یو ورځنیو سیالیو په دوام، نن د خوست په ملي کرکټ لوبغالي کې د تخار لوبډله د کوربه ولایت له ب لوبډلې سره مخ شوه.
د دې لوبې پچه د تخار لوبډلې وګټله او د توپ اچونې پرېکړه وکړه.
د تخار توپ اچوونکو د خوستي توپوهونکو پر وړاندې ښه توپ اچونه وکړه او د یادې لوبډلې ټول لوبغاړي یې په ۴۰ اورونو کې په ۱۶۴ منډو له ډګره بهر کړل.
د کوربه لوبډلې له پاره اکبر علي ۴۸ او لوبډلمشر نسیم منګل ۴۰ منډې جوړې کړې.
د تخار له پاره بلوچ ۳، نعیم الله، امین ساحل او عیسی خان هر یوه دوه او شبیر احمد یوه وېکټ ترلاسه کړه.
خوستۍ ب لوبډلې له خپل هدف څخه ښه دفاع پیل کړه، چې د یوې جالبې لوبې وروسته یې د تخار ولایت لوبډله په ۱۴۸ منډو له ډګره بهر کړه او په ۱۶ مندو یې بریا خپله کړه.
د تخار له پاره یې لوبډلمشر امین ساحل نیمه سلیزه جوړه کړه ، خو لوبډله یې تر بریا ونشوه رسولی.
د خوست ب لوبډلې له پاره لوبډلمشر نسیم منګل بهترین باولینګ وکړ او ۵ وېکټې یې ترلاسه کړې.
د نوموړي ترڅنګ ګوهر ارمان ۳ او عبدالمجید سنګین ۲ لوبغاړي د سیالۍ له ډګره بهر کړل.
نسیم منګل، چې هم یې ۴۰ منډې جوړې کړې وې او هم یې د خپلې لوبډلې په ګټه د تخار ۵ وېکټې ترلاسه کړې وې، د لوبې غوره لوبغاړی ونومول شو.
