کابل کې د ټولشموله ورزشونو لومړنی ورزشي جشن ترسره شو
د المپيک، بدنی روزنې او ورزش عمومي رياست اړوند د ټولشموله ورزشونو آمريت له لوري او د روشن مخابراتي شرکت په مالي ملاتړ د کابل ولايت، پغمان ولسوالۍ په باغ بالا ماڼۍ کې د ورزش د ودې او ټولنه کې دودولو په موخه د « روشن، ورزش د ټولو لپاره» په نوم لومړی پړاو ورزشي جشن ترسره شو.
په دغه ورزشي جشن کې، د المپیک، بدني روزنې او ورزش عمومي رياست لوی رئيس، مولوي احمدالله وثيق، د دې ادارې فني او مسلکي مرستيال حافظ احمد جان ځدراڼ، د رهبرۍ غړو، د دې ادارې پخواني رئيس انجنير نظر محمد مطمئن، د رياست الوزراء د دفتر مرستيال مفتي مستقيم، د روشن مخابراتي شرکت د بازار موندنې مرستيال عبدالعزيز نيازي، د کليو بيارغونې او پراختيا وزارت د تفتيش رئيس مولوي محمد هاشم ذاکر، د کابل ښاروالۍ فرهنګي رئيس قاري ولي ګل جواد، د ارګ د مطبوعاتو رئیس ملا محمد نسيم هلال، د حج او اوقافو د اطلاعاتو رئيس مولوي فضل محمد حسيني، د ميوند بانک رئیس مفتي عبدالله اخندزاده، ج.ه.ادي شخصيت سلمان اغا، ورزشي مسؤلينو، ورزشکارانو او ګڼ شمېر د ورزش مينوالو ګډون کړی و.
د ياد ورزشي جشن ګډونوالو ته د وينا پر مهال د هېواد ورزش ادارې عمومي رئيس مولوي احمدالله وثيق وويل، خوښ يم، چې نن د دغه ورزشي برنامي له امله د سلګونو خلکو په خوله خندا ده او دا يې د دې ادارې لپاره ستره لاسته راوړنه ياده کړه.
همدارنګه نوموړي، دغه ډول برنامې په خلکو کې د ورزش د فکر او دودولو لپاره ګټورې وبللې.
دغه راز ښاغلي وثيق زياته کړه، چې افغان ورزشکاران ښه استعدادونه لري، چې له امله يې په بېلابېلو نړيوالو سياليو کې د افغانستان په نوم زيات مډالونه ګټلي دي.
د ورزش ادارې د ټولشموله ورزشونو آمر محمد عارف پیمان، د دغه ورزشي جشن موخه په خلکو کې د ورزش دودول او د ورزش پر اهمیت د خلکو پوهول یاد کړل.
همدارنګه د روشن مخابراتي شرکت د بازار موندنې مرستيال، عبدالعزیز نيازي د جشن ګډونوالو ته د وينا پر مهال وويل، روشن مخابراتي شرکت تل د هېواد په بېلابېلو ورزشي، اقتصادي او خدمتي برخو کې فعاله ونډه اخيستې ده او تل يې د ورزش ملاتړ کړی دی.
په دغه ورزشي جشن کې د ځغاستې او رسۍ کشولو پر سياليو سربېره د فوټبال، د WTF تکواندو، پهلواني، جمناسټیک، تورې وهنې، پانکرېشن، بوکسېنګ، کونګ فو، پارکور، ووشو او يوني فايټ ورزشکارانو له لوري په زړه پورې نمايشات نندارې ته وړاندې شول، چې د مسؤلینو او خلکو له لوري وستايل شول.
د يادونې وړ ده، چې د ياد جشن په پايله کې د ځغاستې سيالۍ په برخه کې عبیدالله محمدزاده لومړی مقام، هدايت دويم او رامين درېيم مقام ترلاسه کړ. همدارنګه د رسۍ کشولو په سيالي کې د يوني فايټ لوبډلې پانکريشن لوبډلې ته ماتې ورکړه، چې د مسولينو له لوري د ځغاستې سيالۍ اتلانو ته کپونه او د جشن برخه اخيستونکو ته ستاينليکونه ورکړل شول.
