کاپيسا کې د ۳۵ ورزشکارانو ترمنځ د بدن ښکلا ټاکنيزې سيالۍ ترسره شوې
د کاپيسا ولايت د بدني روزنې او ورزش امريت اړوند د فټنس او بدن ښکلا ملي فدراسیون د استازولۍ له لوري د ياد ولايت په نثار احمد بهاوي ورزشي لوبغالي کې د ۳۵ ورزشکارانو ترمنځ د بدن ښکلا ټاکنيزې سيالۍ ترسره شوې.
دغه سيالۍ، چې په بېلابېلو کټګوريو ترسره شوې، په پايله ۲۰ تنه ورزشکاران د کاپيسا ولايت د بدن ښکلا منتخبې لوبډلې ته وټاکل شول.
د يادو سياليو موخه د کاپيسا ولايت د بدن ښکلا منتخبې لوبډلې ته د غوره ورزشکارانو موندل و، چې يوه ورځ يې دوام وکړ.
د سياليو په پای کې د ورزش مسوولينو له لوري غوره ورزشکارانو ته مډالونه او د اتلولۍ حکمونه ورکړل شول.
