هلمند؛ په ناوې ولسوالۍ کې د اتو لوبډلو ترمنځ د ټېپ بال کرکټ سيالۍ پای ته ورسېدې
د هلمند ولايت د بدني روزنې او ورزش امريت له لوري د ياد ولايت د ناوې ولسوالۍ په هزار اسپ سيمه کې د اتو لوبډلو ترمنځ د ټېپ بال کرکټ ګروپي سيالۍ چې درې اوونۍ مخکې پيل شوې وې د توحیدي يارانو لوبډلې په اتلولۍ پای ته ورسېدې.
د دغو سياليو پايلوبه د نوي ځوانان او د توحيدي يارانو لوبډلو ترمنځ ترسره شوه، نوي ځوانان لوبډلې د پچې په ګټلو سره د توپ وهنې پرېکړه وکړه چې په ټاکلو ۱۴ اورونو کې مقابلې لوبډلې ته يې د ۱۶۵ منډو هدف وټاکه. په ځواب کې د توحيدي يارانو لوبډلې ټاکل شوې هدف د لوبې په ۱۱ اور کې د اوو لوبغاړو په سوځېدو سره پور کړ او د درې ويکټو په توپير سره يې اتلولي وګټله.
د يادو سياليو موخه راتلونکو لوبو ته د غوره لوبغاړو موندل و.
