د هېواد ورزش ادارې رهبري د جوزجان له والي سره ولیدل
د المپیک، بدني روزنې او ورزش عمومي رئیس مولوي احمدالله وثیق او ورسره مله پلاوي يې د هېواد شمال ته د سفر په ترڅ کې د جوزجان له والي مولوي ګل حیدر شفق سره ولیدل.
په دغه لیدنه کې د المپیک، بدني روزنې او ورزش عمومي رئیس مولوي احمدالله وثیق، د ياد رياست فني او مسلکي مرستیال حافظ احمد جان ځدراڼ، ورزشي ارشد سلاکار قاري حیات الله رحماني او ورسره مله پلاوي ګډون کړی و.
د دې لیدنې په ترڅ کې ښاغلي وثیق د هېواد د وروستیو ورزشي لاسته راوړنو پر اړه خبرې وکړې او وې ويل چې هڅه کوي د هېواد هرې برخې او هر قشر ته ورزش ورسوي.
د جوزجان والي ښاغلي مولوي ګل حیدر شفق همداراز د بېلابېلو ورزشي برخو وروستیو ملي او نړیوالو لاسته راوړنو او فعالیتونو ستاینه وکړه او په دې ولایت کې یې د ورزش د ودې لپاره د هر ډول ممکنه مرستو د ملاتړ ژمنه وکړه.
