کونړ؛ له تېرو شلو کلونو وروسته په لومړي ځل د واليبال منتخبې لوبډلې د غوراوي سیالۍ پيل شوې
د کونړ ولايت د ورزش امريت او واليبال فدراسيون په همغږۍ د مرکز اسعد اباد ښار په نو اباد سيمه کې د ١٢ لوبډلو ترمنځ د واليبال منتخبې لوبډلې د ټاکلو سيالۍ پيل شوې.
دا په تېرو شلو کلونو کې لومړى ځل دى چې د دې ولایت د واليبال منتخبې لوبډلې د غوراوي سیالۍ ترسره کيږي.
د دغو سياليو په پيل کې څلور لوبي وشوې، په لومړۍ لوبه کې غازي اباد او وټه پور لوبډلې د یو بل پر وړاندې ولوبېدې چې ٢-١ میدانونو په توپیر غازي اباد لوبډلې وګټله.
په دوهمه لوبه کې ننګلام لوبډلې ٢-١ میدانونو په توپیر غازي اباد لوبډلې ته ماتې ورکړه، درېيمه لوبه د نرنګ او نواباد لوبډلو ترمنځ وشوه، چې ٢-١ میدانونو په توپیر د نرنګ لوبډلې په ګټه پاى ته ورسېده.
او څلورمه لوبه بيا د وخت د کمښت له کبله مساوي اعلان شوه چې نن به بیا ترسره شي.
