کابل کې د کابل فوټسال غوره ليګ شپږم پړاو سيالۍ د ش.ه. يد نسيم لوبډلې په اتلولۍ پای ته ورسېدې
د فوټبال ملي فدراسیون د فوټسال ملي کميټې په مرکزي لوبغالي کې د ۱۳ لوبډلو ترمنځ د کابل فوټسال غوره ليګ شپږم پړاو سيالۍ، چې ۴۰ ورځې مخکې پیل شوې وې د ش.ه. يد نسيم لوبډلې په اتلولۍ پای ته ورسېدې.
دغه سيالۍ، چې تېره شپه پای ته ورسېدې، په پايلوبه کې ش.ه.يد نسيم لوبډلې خپلې سیالې ظاهر اسد لوبډلې ته د ۳/۱ ميدانونو په توپير ماتې ورکړه او اتلولي يې خپله کړه.
په دغو سياليو کې اميد قنبري د زياتو ګولونو وهونکی، ابوالفضل رحيمي غوره ګول ساتونکی او فرزاد محمودي غوره لوبغاړی وټاکل شو.
د يادولو وړ ده، چې دغو سياليو د پای مراسمو کې د المپيک، بدني روزنې او ورزش عمومي رييس مولوي احمد الله وثيق، د فوټبال ملي فدراسیون رییس محمد يوسف کارګر، د ورزش ادارې او د فوټبال ملي فدراسیون فني او مسلکي مرستيال حافظ احمد جان ځدراڼ، د يادې ادارې ورزشي مشاور قاري حيات الله رحماني، د فوټبال ملي فدراسیون مسوولينو، ورزشکارانو او زيات شمېر مينوالو ګډون کړی وو.
هېره دې نه وي، چې د ش.ه.يد نسيم او ظاهر اسد لوبډلې د لومړي او دویم مقام په ترلاسه کولو د افغانستان زونونو د فوټسال اتلانو سياليو ته او پنجشېر اف سي او ياران افغان لوبډلې د کابل ښار د فوټسال لومړۍ پړاو سياليو ته لاره وموندله.
