کابل؛ د کراټي ټاکنیزې سیالۍ ملي لوبډلې ته د ۸۰ ورزشکارانو په غوراوي پای ته ورسېدې
د المپیک، بدني روزنې او ورزش عمومي ریاست په ۲۵۰۰ کسيز جمنازيوم کې د ۵۱۸ ورزشکارانو ترمنځ په کيوکيشن او امتيازي سبک کې د کراټې ټاکنيزې سيالۍ ملي لوبډلې ته د ۸۰ ورزشکارانو په غوراوي سره پای ته ورسېدې، چې پنځه ورځې يې دوام.
په دغو سیالیو کې د ۲۰ ولایتونو ۵۰۵ ورزشکارانو او له ایران هیواد څخه د افغان مهاجرینو ورزشکارانو ۱۳ کسیزې لوبډلې هم ګډون کړی وو.
دغه سيالۍ د ځوانانو او لويو ورزشکارانو په عمري او له ۵۰ کيلو ګرام څخه تر ۹۰ کيلو ګرام وزني کټګوريو کې ترسره شوې، چې پايله کې په کیوکیشن سبک کې ۲۰ ورزشکاران د لويانو له کټګورۍ او ۲۰ ورزشکاران د ځوانانو له کټګورۍ څخه او په امتیازي سبک هم۲۰ ور شکاران د لويانو له کټګورۍ او ۲۰ ورزشکاران د ځوانانو له کټګورۍ څخه، وټاکل شول، چې ټول ۸۰ ورزشکاران کېږي.
د یادو سياليو د پای مراسمو ته د المپیک، بدني روزنې او ورزش عمومي رييس مولوي احمد الله وثيق، د ياد رياست پخوانی رييس انجينر نظر محمد مطمئن، د ورزش ادارې ورزشي مشاور قاري حيات الله رحماني، د کراټې ملي فدراسيون رهبري، د ورزش ادارې د اطلاعاتو او عامه پوهاوي رياست رييس اتل مشواڼی، ورزشکاران او زيات شمېر مينوال راغلي وو.
یاده دې وي، چې د ولايتونو په کچه د کيوکيشن سبک او د لويو ورزشکارانو په عمري کټګورۍ کې هرات لومړی، فراه دويم او خوست درېيم مقام ترلاسه کړ او د ځوانانو په عمري کټګورۍ کې بیا هم هرات لومړی ، خوست دويم او بادغيس درېيم مقام ترلاسه کړ او امتيازي سبک کې کابل لومړی، مهاجرينو لوبډلې دويم او غزني درېيم مقام ترلاسه کړ.
