پکتیا؛ احمدخېلو ولسوالۍ کې ۷۰ لوبډلو ترمنځ د والیبال سیالۍ پیل شوې
د پکتیا ولایت د بدني روزنې او ورزش ریاست په همکاري او د بسم الله ځاځي په مالي مرسته د یاد ولایت په احمد خېلو ولسوالۍ کې د ځوانانو په نوم د والیبال سیالۍ پیل شوې چې ۴۵ ورځې به دوام وکړي.
په دغو سیالیو کې له کابل، لوګر، غزني، میدان وردګ، خوست، کاپیسا، لغمان، ننګرهار او پکتیا ولایتونو څخه ۷۰ لوبډلو ګډون کړی دی او لومړۍ لوبه یې د بسم الله او شفیق الله لوبډلو ترمنځ ترسره شوه چې په پایله کې یې بسم الله لوبډلې د ۳-۱ میدانو په توپیر خپلې سیالې لوبډلې ته ماتې ورکړه.
یادې سیالۍ ورزش ته د ځوانانو د هڅولو په موخه په لاره اچول شوي او ټاکل شوې چې اتلې لوبډلې ته به ۲۰۰زره افغانۍ نغدي جایزه ورکړل شي.
