بادغیس کې د اتو لوبډلو ترمنځ د فوټبال غوره لیګ سیالۍ پای ته ورسېدې
د بادغیس ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت په مرکز قلعه نو ښار کې د اتو لوبډلو ترمنځ د فوټبال غوره لیګ سیالۍ د حماسه کلب لوبډلې په اتلولۍ پای ته ورسېدې.
په دغو سیالیو کې د حماسه کلب لوبډلې د ۳۳ امتیازونو په ترلاسه کولو لومړی او د استقلال لوبډلې د ۳۱ امتیازونو په ترلاسه کولو دویم مقام ترلاسه کړ.
دغو سیالیو کې حمید الله سعیدي غوره لوبغاړی، عبدالرحمن حمیدي غوره ګول وهونکی او عتیق الله محمدي غوره ګول ساتونکی وپېژندل شول.
د یادو سیالیو موخه د فوټبال ورزش ته وده ورکول او د لویدیځ زون د اتلولۍ سیالیو ته د غوره لوبډلې موندل و، چې پنځه ورځې یې دوام وکړ.
د سیالیو په پای کې غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
