په هلمند کې د ځوانانو باشګاهي فوټبال سياليو اتلولي قيس غني لوبډلې وګټله

د هلمند ولايت د بدني روزنې او ورزش امريت او فوټبال فدراسيون له لوري د فوټبال د شپږو لوبډلو ترمنځ پيل شوې سيالۍ د قيس غني لوبډلې په اتلولۍ پای ته ورسېدې.

نوموړې سيالۍ چې دوه اونۍ وړاندې پيل شوې وې، پايلوبې ته يې قيس غني او باک لوبډلې لار موندلې وه، چې په پايله کې قيس غني لوبډلې خپلې سيالې لوبډلې ته د ۳_۰ ګولونو په توپير ماتې ورکړه او د يادو سياليو اتلولي يې ترلاسه کړه.

يادې باشګاهي سيالۍ د لشکرګاه په مرکزي لوبغالي کې ترسه شوې او موخه يې د ولايت په کچه د منتخبې لوبډلې ټاکل و، تر څو په راتلونکې کې د زون په کچه سياليو کې ښه لاسته راوړنه ولرلی شي.

په پای کې غوره لوبډلو او لوبغاړو ته د ياد ولايت د فوټبال فدراسيون له لوري ستاينليکونه او ډالۍ ورکړل شوې.