په خوست کې د فوټبال زرغون جام سياليو اتلولي سعدي کلب ترلاسه کړه
د خوست ولایت د نادرشاه کوټ ولسوالۍ اړوند د ترکۍ کلي د فوټبال لیګ، چې لسو کلبونو پکې برخه اخيستې وه د سعدي کلب په اتلولۍ پای ته ورسېد.
دغه ليګ پوره شل ورځې دوام وکړ، له پرلپسې سياليو وروسته سعدي او ترکۍ چيلنجر کلبونه په دې وتوانېدل چې پايلوبې ته لار پيدا کړي.
سعدي او ترکۍ چيلېنجر کلبونو د پايلوبې په لومړي ټاکلي وخت کې د يوې په زړه پورې لوبه وروسته مساوي اعلان شول؛ خو د کمېټې د بيا ځلې ورکړي وخت څخه سعدي کلب بشپړه ګټه پورته کړه او سيالې لوبډلې ترکۍ چيلېنجر کلب ته يې د ۲_۰ په توپير ماتې ورکړه او د ياد ليګ اتلولي يې خپله کړه.
د نوموړي ليګ د پای په مراسمو کې قومي مشرانو، د سیمې فعالو ځوانانو، ورزشکارانو او د ورزش ګڼو مینه والو برخه اخیستې وه.
په پای کې غوره لوبډلې او غوره لوبغاړو ته کپونو، مډالونو او ډالۍ و کړل شوې.
