هلمند؛ عمري ځوانانو لوبډلې د اختريز جام په نوم د فوټبال سياليو اتلولي وگټله
د هلمند ولايت د بدني روزنې او سپورټ امريت اړوند د فوټبال فدراسيون د استازولۍ له لوري د ياد ولايت په گرمسېر ولسوالۍ کې د اتو لوبډلو ترمنځ د اختريز جام په نوم د فوټبال سيالۍ د عمري ځوانانو لوبډلې په اتلولۍ پای ته ورسېدې.
د يادو سياليو پايلوبه د عمري ځوانانو او گران افغان لوبډلو ترمنځ ترسره شوه، چې په ټاکلي وخت سيالۍ ۰/۰ مساوي پای ته ورسېده، خو په پنالټيانو کې عمري ځوانانو لوبډلې سيالې لوبډلې ته د ۲/۴ گولونو په توپير ماتې ورکړه او اتلولي يې خپله کړه.
د يادونې وړ ده، چې د دغو سياليو په پای کې لومړي او دوهم مقام گټونکو لوبډلو ته کپونه او غوره لوبغاړو ته بېلابېلې چمتو شوې ډالۍ ورکړل شوې.
